Mangfoldige minner

Prosjektet, som blir administrert av Norsk lokalhistorisk institutt (NLI) går ut på innsamling, dokumentasjon og formidling av minnemateriale i samband med "nyinnvandringa" til norske lokalsamfunn i etterkrigstida.

- Lokalhistoria har favorisert den etablerte, veltilpassa og fastbuande befolkninga, og særleg den delen som har slektsrøtter i lokalsamfunnet. Med dette prosjektet, som er spesielt retta mot å produsere nytt kjeldemateriale på grunnlag av munnlege kjelder, vil det bli høve til å rette opp denne ubalansen, uttalar forskar Ola Alsvik i Norsk Lokalhistorisk institutt

Prosjektet blir realisert gjennom to delprosjekt, som vil omfatte aktørar og lokalsamfunn spreidde over heile landet.

 "Vi" og "Dei andre"
- Dette delprosjektet vil stimulere historielag og innvandrarorganisasjonar i Noreg til å starte med innsamling av minnemateriale og fotografisk materiale i samband med nyinnvandringa. Noko som vil vere lærerikt ikkje berre for historielaga, men òg for lokalsamfunnet som heilskap, seier Alsvik.

Målet er å få kunnskap om korleis innvandrarar med ulik etnisk bakgrunn opplever møtet med lokalsamfunnet.
 

Forteljingar frå mangfolds-Noreg
Det andre delprosjektet vil fokusere på immaterielle kulturminne i innvandrarmiljøa. Målet er å samle inn og tilgjengeleggjere tradisjonsmateriale frå minoritetsmiljøa og deira møteplassar, noko som òg vil skape engasjement til å definere og å samle inn folklore i minoritetsmiljøa.

- Kva slag songar, sagn, forteljingar og dikt blir haldne i live i utkantane av det norske majoritetssamfunnet? Og ved migrasjon - kva tradisjonar overlever, eller kanskje det oppstår noko heilt nytt, seier Ola Alsvik.

Prosjektet blir skipa i lys av Mangfaldsåret 2008, og er eit samarbeid mellom Norsk lokalhistorisk institutt (NLI), Norsk Folkeminnelag (NFL) og Landslaget for lokalhistorie (LLH).

                      
Kulturrådet gir 600 000 kroner til prosjektet.